बैतडी
बैतडीको डिलाशैनी गाउँपालिकाले सुक्रबार आर्थिक बर्ष २०७९/८०को बजेट सार्वजनिक गरेको छ । पालिकाले आउने आर्थिक बर्षका लागी ६२करोड ३५लाख ५९हजार रकमको बजेट ल्याएको हो ।
गाउँपालिकाको उक्त बजेटमा कृषि, शिक्षा र स्वास्थ्यलाई प्राथमिकतामा राखिएको गाउँपालिका प्रवक्ता यज्ञराज भट्ट्(यदु)ले बताए । उनले भने,“हामीले बजेटमा शिक्षा र स्वास्थ्य लाई मुख्य प्राथमिकतामा राखेका छौँ । कृषि र पशु पालनलाई व्यवसायीकरण गरेर नागरिकको आर्यआर्जन बृद्धी गर्न बजेट छुट्याएका छौँ ।” आर्थिक बिकासको योजनालाई प्राथमिकता दिइएको उनले बताए ।
गाउँपालिकामा चिकित्सकीय सेवा प्रदान गर्नका लागि एकजना डाक्टर र एकजना जनस्वास्थ्य अधिकृतको व्यवस्थागरिने बजेटमा उल्लेख छ । माध्यमिक तहका १२ओटै विद्यालयहरुमा एकएक जना स्वास्थ्यकर्मीको व्यवस्था गरिने गाउँपालिकाले जनाएको छ । विद्यालयमा स्वास्थ्यकर्मी कार्यक्रम अन्तरगत विद्यार्थीको नियमित स्वास्थ्य परिक्षण गरिने बताइएको छ । यसैगरी स्वास्थ्य स्वयसेविकाहरुलाई बिशेष भत्ता सुविधा सहित परिचालन गर्ने कार्यक्रम बजेटमा उल्लेख रहेको छ ।
जेष्ठ नागरिकका गुनासा, अनुभव र सुझाव ग्रहण गर्न “बाजेको अर्ति” कार्यक्रम राखिएको छ । यसैगरी युवा संग अध्यक्ष कार्यक्रम समावेश गरिएको छ ।
गाउँपालिकाको पारदर्शिताका लागि सुचना प्रविधिको विकास गर्न भन्दै एफएम रेडियो र पत्रिका सञ्चालन गर्ने कुरा बजेटमा उल्लेख छ ।
सहिद परिवारलाई मासिक ३हजार रकम भत्ता दिने कार्यक्रम तय गरिएको छ । गाउँपालिका स्तरीय कृषि नर्शरी स्थापना गर्ने, कृषक संग कृषि प्राविधिक कार्यक्रम सञ्चालनमा ल्याए उत्पादमा वृद्धि गर्ने कार्यक्रम तय गरिएको छ ।
पशुपालन तर्फ बाख्रा पालन, कुखुरा तथा कालिज पालन र माछा पालन गर्ने कृषकका लागि बजेटको व्यवस्था गरिएको छ ।
