बैतडी
बैतडीका केहि स्थानियतहले करारका कर्मचारीको करार थप नगर्ने भएकाछन् । आवश्यकता बेगर तलवको श्रोत सुनिश्चीत नभई नियुक्त गरिएका जिल्लाका करिब अढाईसय कर्मचारीको करार अवधी थप नहुने भएको हो ।
जिल्लाको दशरथचन्द नगरपालिकाका १सय ३९जना, डिलाशैनी गाउँपालिकाका ५८जना, दोगडाकेदार गाउँपालिकाका १५जना, पुर्चौडी नगरपालिका र सुर्नया गाउँपालिकाका १२–१२जना, पञ्चेश्वर गाउँपालिकाका ६ जनाको करार अवधी नथपिएको सम्बन्धीत स्थानियतहले बताएकाछन् ।
करार अवधी थप नभएका कर्मचारीहरुलाई १ साउन देखि हाजिर नलगाउन सुचीत गरिएको छ ।
जिल्लाको डिलाशैनी गाउँपालिकाले करार अवधी थप नगरेका कर्मचारीमा अधिकांश चुनावको १महिना अघिमात्रै नियुक्त भएका व्यक्तिहरु रहेकाछन् । गाउँपालिका प्रवक्ता यज्ञराज भट्टले भने,“हामीले २०७८चैत महिनामा नियुक्त गरेका कर्मचारीको करार अवधी नथप्ने निर्णय गरेका हौँ । आवश्यकता नै नभएका ठाउँमा राजनितिक पुर्वाग्रहका आधारमा राखिएका कर्मचारीको तलव व्यवस्थापन गर्न नसकिने भएकाले उनिहरुको करार अवधी थप नगरिएको हो ।”
जिल्लाको शुर्नया गाउँपालिकामा कार्यरत १२जना कर्मचारीहरुको नियुक्ती नथपिने बताइएको छ । गाउँपालिकाका प्रमुख प्रशासकीय अधिकृत हिमांशु भट्टले भने,“बिगतमा भ्याकेन्सी बिनै नियुक्त गरिएका कर्मचारी हटाउने निर्णयका आधारमा उनिहरुको करार अवधी नथपिएको हो ।”
जिल्लाको दशरथचन्द नगरपालिकाले सबैभन्दा बढी १सय ३९ कर्मचारीको करार अवधी नथपिएको नगरपालिकाले जनाएको छ ।
पुर्चौडी नगर पालिकामा नगरसभाको निर्णय अनुसार १२जना कार्यालय सहयोगीको करार अवधी थप नगरिएको प्रमुख प्रशासकीय अधिकृत बीर बहादुर नेपालीले बताए । यसैगरी पञ्चेश्वर गाउँपालिकामा कार्यरत ६ जना प्राविधिक कर्मचारीहरुले सन्तोशजनक काम नगरेको जनगुनासो आएकाले उनिहरुलाई हाजिर नलगाउन सुचना जारी गरिएको छ ।
६ महिनाको करार नियुक्ती लिएर काम गर्दै आएका करार कर्मचारीहरु रोजगारीमुक्त हुनुपरेकोमा चिन्तीत बनेकाछन् ।
आफ्नो करार अवधी नथपिएसंगै आगामी दिनमा के गर्ने भन्ने चिन्ता बढेको दोगडाकेदार गाउँपालिका १ रीम कफल्डाका लक्ष्मीदत्त जोशीले बताए ।
उनले भने,‘म २०७३सालदेखी कार्यरत थिएँ । हरेक ६महिनामा करार थपिदैँ आएको थियो । अहिले गाउँपालिकामा बुझ्दा नियुक्ती नबनेकोे कुरा थाहा भयो । अब के गर्ने भन्ने चिन्ता बढेको छ । विगतमा निकालेको ४लाख रकमको किस्ता तिर्नु बाँकी छ । कसरी ऋण तिर्ने भन्ने तनावमा छु ।’
पाटन नगरपालिकामा भने कर्मचारीको अवस्था मुल्यांकन गरि थपघट गर्ने बिषयमा निर्णय हुने नगर उपप्रमुख कमल सिंह बोहराले बताए । उनले भने,“अहिले ३महिना करार अवधी थपेका छौँ । मुल्यांकन समिती बनाएका छौँ । समितिले ३महिना मुल्यांकन गरि प्रगती पतिवेदन पेश गर्छ । सोही आधारमा कर्मचारी थपघट गर्ने निर्णय गरिनेछ ।”
जिल्लाको मेलौली नगरपालिका, सिगास गाउँपालिका र शिवनाथ गाउँपालिकाले भने कर्मचारी हटाएको छैन् । आफ्नो गाउँपालिकामा अनावश्यक कर्मचारी नै भर्ना नगरेकाले हटाउनुपर्ने बाध्यता नरहेको शिवनाथ गाउँपालिका अध्यक्ष कर्णसिंह साउँदले बताए ।
