बैतडी
दार्चुलाको शैल्यसिखर नगरपालिका वडा न. ९ जिल्लाकै दोश्रो ठुलो सहर गोकुलेश्वर बजारको वडा हो । यस वडाका नव निर्वाचित वडाअध्यक्ष प्रजापती पाण्डेयलाई अहिले ८४बर्ष ११महिना पुगेको छ । आगामी भदौ महिनामा उनि ८५ बर्षमा टेक्दैछन् ।
वडाअध्यक्ष पाण्डेयले नेपाली कांग्रेसको किल्ला भत्काउदैँ नेकपा एमालेबाट चुनाव जितेका हुन् । गोकुलेश्वरमा यसअघि २०७४को चुनावमा भने कांग्रेसको धनीदत्त बिष्टले विजय हासिल गरेका थिए ।
पाण्डेय २०५४सालको निर्वाचनबाट समेत तत्कालिन गाबिसको वडाअध्यक्षमा निर्वाचित भएका व्यक्ति हुन् । उतिबेला उनले विद्यालयका भवन संरचना, गाविस भवन, सिचाई पोखरी आदि निर्माण गरे । उनि भन्छन् ‘अहिलेको भन्दा त उतिबेला नै काम गर्न सहज थियो । उतिवेला नियम कानुनको पुर्ण पालना हुन्थ्यो । अहिलेको जस्तो बजेट हिनामिना गर्ने ज्यादती थिएन् । अहिले सबै मान्छे छाडा भएकाछन् । नियम एउटा बनाउछन् प्रवृत्ति अर्कै हुन्छ । उतिबेला वडामा बार्षीक ५०हजार रकम मात्रै आउथ्यो तर अहिले त बजेट पनि थुप्रै छ । उक्त बजेटको राम्रो सदुपयोग गर्दै गरिब र निमुखा जनताको भलाईका लागि काम गर्नेछु ।’
अध्यक्ष पाण्डेय २०३६सालबाट राजनितिमा लागेका हुन् । त्यसअघि २०१७ सालमा उनले अहिले डिग्री सम्मको पढाई हुने स्कुलको स्थापना गरेको बताए । उनले भारतको पिथौरागडमा कक्षा १० सम्मको अध्ययन गरेका हुन् । मोटर बाटो नभएकाले उनि हिडेर भारत जान्थे र हिडेरैँ घर फर्किन्थे । पिथौरागढमा पढेका पाण्डेय शिक्षण गर्न गाउँ फर्किएका थिए । उनले गोकुलेश्वरमा स्कूल खोलेर आफै हेडमास्टर पनि बने । पाण्डेयको नेतृत्वमा गाउँघरमा बाटो, कुवा, धारा, विद्यालय, मन्दीर लगायतका भौतिक संरचनाहरु निर्माण भएका थिए ।
अहिले वडाअध्यक्षमा चुनाव जितेपछि उनि निकै खुशी छन् । पाण्डेयले भने, ‘जनताले जिताएका कारण अध्यक्ष पदमा पुगेको हुँ । इमान्दारीताका साथ काम गर्नेछु र अरु जनप्रतिनिधिहरुलाई पनि निति नियमको पालना गर्दै जनताप्रति बफादार रहेर काम गर्न आग्रह गर्छु । देशमा नियम कानुनको पालना नभएकै कारण देश बिग्रीएको हो अब सुधार गर्ने जिम्मा नयाँ राजनितिकर्मीहरुको हो ।’ विभिन्न पदमा निर्वाचित व्यक्तिहरुलाई आर्थिक अनियमितता नगर्न पाण्डेयको सुझाव छ ।
८५बर्षको उमेरमा समेत सारीरिक रुपले स्वस्थ रहेका पाण्डेय जिवनकालमा आफु कहिल्लै बिरामी नपरेको सुनाउछन् ।
