बैतडी
बैतडीको सुर्नया गाउँपालिका वडा न.१ हटैराजका कृत बहादुर चन्द २०७३ सालमा साउदी अरव गए ।
पाइप कम्पनीमा अपरेटरको काम गर्न गएका उनलाई मजदुरको काम दिइयो भने, मासिक १८सय(अरवी रुपँया) तलव भनिएकोमा १४सय मात्रै दिइयो । यस बाहेक खान बस्न समेत आफैले व्यहोर्नु पर्दथ्यो ।
यसै सुबिधामा चित्त बुझाएका चन्दलाई आफ्नै गाउँलेले रातदिन दुख दिइरहे । उनले भने,‘ मेरै गाउँका मोहन चन्दले मलाई खाल्डोमा हाल्ने, पासोमा झुण्ड्याउने देखि करेन्ट लगाउने सम्मका दुख दिए । अन्तीममा काम गर्ने क्रममै मेरो हातका औलाहरु काटिएपछि म घर फर्किए ।’
४६ बर्षिय चन्दका बायाँ हातका औलाहरु चल्दैनन् ।
उनले कम्पनीमा काम गर्ने बेला मेसिनले थिचिएर औलाहरु काटिएका हुन् । आफु घाइते हुदाँ बिमा वाफतको रकम वा अन्य कुनै राहत नपाएको बताए । उनले भने,‘म घाइते हुदाँ नेपाली १५लाख रकम पाइन्छ भन्ने सुनेको थिएँ । तर एक रुपँया पनि पाउन सकेन् । म अनविज्ञ रहेको अरवी भाषामा केहि कागजातहरु पनि बनाइए कागजमा मलाई दस्तखत र औठाछाप गर्न भनियो । मैले जे भन्यो त्यहि गरेँ । तर रकम भने पाएन् । मेरो रकम मलाई फसाउने मान्छेहरुले खाएको हुनसक्छ ।’ उनले ४ कक्षा मात्रै पढाई गरेको बताए ।
चन्दले साढे ३ बर्ष साउदी अरवमा काम गरेर पनि बिना पैषा घर फर्किन बाध्य भएको बताए । उनले भने,‘मेरै गाउँलेले मलाई रातदिन सताउने, खान र सुत्न नदिने, मेरो घरका मान्छेहरु संग उनिहरुको घरका मान्छेले झगडा गर्ने भएकाले कोरोना कहरका बेला जसोतसो ज्यान जोगाएर घर पुगेँ ।’
घर फर्किन ६० हजार रकम खर्च गरेको उनले बताए । गाउँकै नरेन्द्र चन्दले मेनपावर कम्पनी संग गरिदिएको सम्पर्कका आधारमा १लाख ५०हजार रकम खर्च गरेर बैदेशिक रोजगारीमा गएको उनले बताए ।
विदेशमा काम गर्दा घाइते भएका चन्दलाई बिमा रकम वा राहत रकम लिन कहाँ जाने के गर्ने भन्ने बिषयमा जानकारी नै छैन् । उनि मेरो भाग्य नै यस्तै रहेछ भन्दै बसेका छन् । अपांगता भएका उनको एक हात नचल्ने भएपनि घरायसी काम समेत गर्न सक्दैनन् ।
विदेशमा घाइते भएका व्यक्तिले योगदानमा आधारीत सामाजिक सुरक्षा कोष मार्फत केहि रकम प्राप्त गर्न सक्ने जिल्ला प्रशासन कार्यालय बैतडीका प्रशासकीय अधिकृत खगेन्द्र भारतीले बताए । उनले भने,‘बिदेशमा काम गर्दागर्दै घाइते भएकोमा बिमा लगायत कुनै राहत पाउने व्यवस्था हुनसक्छ त्यसका लागि राजदुताबास मार्फत कारवाही प्रक्रिया थाल्न सकिन्छ । माग भएका कागजातहरु तयार गरेर रकम पाउन सकिनेछ ।’
