काठमाडौं ।
नेपालमा पहिलो पटक मोटरेबल पक्की पुलसम्बन्धी प्रदर्शनी मेला आयोजना हुने भएको छ । स्थानीय सडक पुल सहयोग इकाई (Local Road Bridge Support Unit - LRB-SU) को पहलमा असार १० र ११ गते ललितपुरको मानभवनस्थित क्रिस्टल ब्याङ्क्वेटमा दुई दिने प्रदर्शनी मेला आयोजना गरिने भएको हो ।
मेलाको उद्देश्य नेपालमा पुल निर्माणका क्षेत्रमा अपनाइएका प्रविधि, डिजाइन तथा विकास कार्यको प्रदर्शन गरी दीर्घकालीन पूर्वाधार विकासलाई टेवा पुर्याउनु रहेको आयोजक पक्षको भनाइ छ ।
एलआरबीएसयूका प्रमुख शकील मानन्धरका अनुसार, मेलामा सातै प्रदेशका भौतिक पूर्वाधार तथा यातायात मन्त्रालय, सडक विभाग, स्थानीय पूर्वाधार विकास विभाग, स्केफ नेपाल, शैक्षिक संस्थानहरू, निर्माण व्यवसायी संघका प्रतिनिधि, निजी क्षेत्रका स्टलहरू तथा पुल निर्माण तथा डिजाइनमा संलग्न इन्जिनियर तथा विज्ञहरूको उपस्थिति रहनेछ ।
मेलामा पुल निर्माणमा प्रयोग भइरहेका नयाँ तथा आधुनिक प्रविधिका मोडेल, देशभर निर्माण भएका पुलहरूको फोटो प्रदर्शनी, डिजाइनसम्बन्धी ज्ञान र डकुमेन्टरीहरू समावेश हुने छन् ।
मेलाको समय असार १० गते दिउँसो १:३० बजेदेखि ४ बजेसम्म र असार ११ गते बिहान १० बजेदेखि दिउँसो ४ बजेसम्म सर्वसाधारणका लागि खुला रहनेछ ।
प्रदर्शनीले नेपालमा पुल निर्माणको दीर्घकालीन विकास र प्रवर्द्धनमा सकारात्मक योगदान पुग्ने विश्वास गरिएको इन्जिनियर हरिशंकर जोशी बताउछन् ।
