काठमाडौं । नेपाली कांग्रेसको शुभेच्छुक संस्था ‘सेन्टर फर डेमोक्रेटिक इन्जिनियर्स’ (सीडेन) को आठौँ कार्यसमितिका लागि प्यानलगत प्रतिस्पर्धा हुने भएको छ ।
पार्टी सभापति शेरबहादुर देउवा पक्षबाट रविभुषण झाको नेतृत्वमा प्यानल बनाइएको छ भने झाको प्यानललाई नेता प्रकाशमान सिंहको समर्थन रहेको छ । नेता सिंह निकटका सुदर्शन शर्मा झाको प्यानलबाट महासचिवको उम्मेदवार बनेका छन् । अर्को प्यानलबाट धनेन्द्र केसी अध्यक्षको उम्मेदवार बनेका छन् भने उक्त प्यानलमा महासचिवको उम्मेदवार भुपेन्द्र श्रेष्ठ छन् ।
तर इन्जिनियर कुलराज खनालले महासचिवमा प्यानल बेगर आफ्नो उम्मेदवारी दिएका छन् । उनले सिडेनलाई गुटगत स्वार्थभन्दा माथि उठाई लोकतान्त्रिक इन्जिनियरहरूको साझा संस्था बनाउनुपर्ने आवश्यकता औंल्याएका छन् ।
खानालले हाल सिडेन विभिन्न स्वार्थ समूहमा विभाजित भई अग्रज इन्जिनियरहरूको योगदानलाई उपेक्षा गर्ने प्रवृत्ति मौलाइरहेको भन्दै त्यसको अन्त्य गर्ने प्रतिबद्धता व्यक्त गरेका छन् । “संगठनलाई व्यक्तिगत स्वार्थपूर्ति र अपारदर्शी नियुक्तिको थलो बनाइएको छ, यो सिलसिला यसैपटकबाट अन्त्य हुन्छ ।” उनले भने ।
नेता प्रधान नभई नीति प्रधान सिडेन अबको आवश्यकता भएको बताउँदै उनले समुहगत राजनीतिभन्दा माथि उठेर संस्थागत हकहितको संरक्षण र प्रवद्र्धन गर्ने अठोट गरेका छन् । साथै, सदस्यता वितरणलाई पारदर्शी र व्यवस्थित बनाउने तथा अन्य दलसँग आबद्ध व्यक्तिहरुलाई सदस्यता बाँडेर संस्थालाई कमजोर पार्ने प्रवृत्तिको अन्त्य गर्ने वचन दिएका छन् ।
नेपाल इन्जिनियर्स एसोसिएसन (ल्भ्ब्) मा पनि आसेपासे मात्रलाई सिफारिस गर्ने प्रवृत्तिको विरुद्ध खनालले आफ्ना उम्मेदवारीलाई न्यायोचित विकल्पका रूपमा प्रस्तुत गरेका छन् । उनले दुःख गरेर संगठन विस्तारमा योगदान दिएका इन्जिनियरहरुलाई नेतृत्वमा ल्याउने वातावरण बनाउने उल्लेख गरेका छन् ।
काठमाडौं इन्जिनियरिङ कलेज स्वतन्त्र विद्यार्थी युनियन सदस्यबाट राजनीतिक यात्रा सुरु गरेका खनाल नेविसंघ स्ववियु सभापतिमा अत्यधिक मतका साथ विजयी भएका व्यक्ति हुन् । उनी प्रविधिक विद्यार्थी परिषद्का केन्द्रीय अध्यक्ष, नेपाल विद्यार्थी संघका निर्वाचित केन्द्रीय सदस्य तथा सिडेन लुम्बिनी प्रदेशका संस्थापक सचिवसमेत रहिसकेका छन् ।
“गुटगत राजनीतिमा नरमाउने तर योगदान गर्ने सबैलाई समेट्ने वातावरण बनाउने मेरो अठोट हो,” उनले भने ।
खानालले आगामी निर्वाचनमा आफुलाई केन्द्रीय महासचिव पदमा निर्वाचित गराउन सम्पूर्ण प्रजातान्त्रिक इन्जिनियर साथीहरुलाई एकजुट हुन अपिल गरेका छन् ।
