काठमाडौं, ९ भदौ । प्रधानमन्त्री कार्यालय मातहतको सार्वजनिक खरिद अनुगमन कार्यालयले ११ वटा निर्माण कम्पनीलाई कालो सूचीमा राखेको छ । कार्यालयले सोमबार सार्वजनिक सूचना जारी गरी ११ कम्पनीलाई कालोसूचीमा राखेको जानकारी गराएको हो ।
होमबहादुर बस्नेतको विशाल होम निर्माण सेवा (उदयपुर), सुन्दर श्रेष्ठको जलेश्वरी महादेव यासवि कन्स्ट्रक्सन (बूढानीलकण्ठ, काठमाडौं), मयंक शाहको सगुन फेब्रिक्स (मोरङ) कालोसूचीमा परेको छ ।
यसैगरी, रामबहादुर बुढाको शुभ आरएस बिल्डर्स सप्लायर्स (बाँके), छत्रबहादुर बुढाको नविन निर्माण सेवा (अछाम), मिथुन चन्दको जेएमसी कन्स्ट्रक्सन (सुर्खेत) र माधव घिमिरेको काश्यप निर्माण सेवा एण्ड सप्लायर्स (काठमाडौं) कालोसूचीमा परेका छन् ।
यस्तै, कृष्णकुमार राईको ग्यालेक्सी कन्स्ट्रक्सन एण्ड सप्लायर्स कम्पनी प्रालि (काठमाडौं), सीताराम श्रेष्ठको जालपा निर्माण सेवा एण्ड सप्लायर्स (काठमाडौं), कर्णबहादुर बुढाको मष्टा भवानी निर्माण सेवा (डोल्पा) र सहिदिन मियाँको शहीद निर्माण सेवा (अर्घाखाँची) कालोसूचीमा परेका छन् ।
काश्यप निर्माण सेवा एण्ड सप्लायर्स दुई वर्षका लागि, मष्टा भवानी निर्माण सेवा डेढ वर्षका लागि कालोसूचीमा परेका छन् । अरु सबै एक वर्षका लागि कालोसूचीमा परेका छन् ।
निर्माणकार्यको जिम्मा लिने तर काम सन्तोषजनक नगर्ने कम्पनीहरुलाई कालोसूचीमा राख्ने गरिन्छ ।
कालोसूचीमा परेका कम्पनीहरुले कालोसूचीमा परेको अवधिभर सार्वजनिक निकायका कुनै पनि खरिद प्रक्रियामा भाग लिन पाउँदैनन् ।
