काठमाडौँ । नेपाल समाजवादी पार्टी (नयाँ शक्ति) ले केन्द्रीय समितिको विशेष बैठक बोलाएको छ । आइतबार बसेको केन्द्रीय कार्यकारिणी समितिको आकस्मिक बैठकले असोज ८ गते केन्द्रीय समितिको बैठक बोलाएको हो ।जेनजी आन्दोलन र त्यसपछिका विकसित राजनीतिक परिस्थितिको गम्भीर समीक्षा गर्दै पार्टीको आगामी नीति तथा कार्ययोजना तय गर्न बैठक बोलाइएको प्रवक्ता कृष्ण शर्माले जानकारी दिएका छन् ।
शर्माका अनुसार बैठकमा भाग लिन केन्द्रीय तहका सबै सदस्यहरू, प्रदेश संयोजकहरु तथा जिल्ला संयोजकहरूलाई समेत आमन्त्रण गर्ने निर्णय गरिएको छ । हिजोको बैठकमा अध्यक्ष डा.बाबुराम भट्टराईले संविधान बचाउन सफल भएकोमा खुशी व्यक्त गरेका थिए । विदेशीको इसारामा देशभित्रका विभिन्न स्वार्थ समूहले विध्वंस मच्चाएको बैठकले निष्कर्ष निकालेको छ ।
‘जेनजी आन्दोलनमा संविधान मास्न चाहने तत्वहरूको घुसपैठ देखिएको छ । विदेशीको इसारामा विभिन्न स्वार्थ समूहले विध्वंस मच्चाए । भिरबाट खस्न लागिएको गाडीलाई जबरजस्ती भित्तामा ठोकाएर प्यासेन्जर बचाउन सफल भइएको छ। अहिलेलाई संविधान बाँच्नु नै सबैभन्दा ठुलो कुरा हो, त्यसमा हामी सफल भयौँ’, भट्टराईको भनाइ उद्धृत गर्दै शर्माले बताए ।
बैठकले हालको राजनीतिक संक्रमणलाई सम्बोधन गर्ने क्रममा पार्टीले युवापुस्ताको आकांक्षा र आन्दोलनमा देखिएको ऊर्जा आत्मसात् गर्नुपर्ने निष्कर्ष निकालेको छ । ‘यो नयाँ पुस्ता र नयाँ नेपालको ऐतिहासिक घडी हो, त्यसैले नेसपा नीतिगत र संरचनात्मक दुवै हिसाबले निर्णायक छलाङ मार्नेछ’, उनले भने ।
यसअघि नेसपाले जेन–जी आन्दोलनप्रति ऐक्यबद्धता जनाउँदै भ्रष्टाचार, नातावाद र असक्षम शासनको अन्त्यका लागि व्यापक सुधारको खाँचो रहेको जनाएको थियो । २०८२ असोज ८ गते हुने बैठकलाई त्यसैको औपचारिक निरन्तरता स्वरूप हेरिएको छ ।
