काठमाडौं ।
भदौ २४ जेनजी प्रदर्शनका क्रममा आगजनीबाट गृह मन्त्रालयमा रहेको करिब ५३ हजार अंगिकृत नागरिकताको अभिलेख जलेर नष्ट भएको खुलेको छ ।
मन्त्रालयको अभिलेखमा रहेको र डिजिटाइजेसन गर्ने क्रममा इन्ट्री भएका सबै विवरणहरू समेत नष्ट भएको गृह मन्त्रालयले जनाएको छ ।
गृह मन्त्रालयका सहायक प्रवक्ता एवं उपसचिव रविन्द्र आचार्यले गृह मन्त्रालयको अभिलेखमा रहेको अंगिकृत नागरिकताको सबै विवरण जलेर नष्ट भएको बताए ।
उनका अनुसार, कतिपय अभिलेखहरू ‘डिजिटाइज्ड’ गर्ने क्रममा कागजातहरू स्क्यान भइरहेको थियो । स्क्यान गरेको डकुमेन्ट राखिएका कम्प्युटर र ल्यापटप पनि जलेको उनले बताए ।
गतवर्ष सरकारले अंगिकृत नागरिकताको विवरण र अभिलेख डिजिटाइज्ड गर्ने योजना बनाएको थियो, त्यसक्रममा करिब १७ हजार विवरण इन्ट्री भइसकेको थियो ।
नेपाली महिलाले विवाह गरेका विदेशी पुरुष र नेपाली पुरुषले विवाह गरेकी विदेशी महिलाले अंगिकृत नागरिकता पाउछन् ।
वैवाहिक नागरिकताको अभिलेख जिल्ला प्रशासन कार्यालयहरूमा रहन्छ । नेपाली महिला र विदेशी पुरुषबाट जन्मेका र नेपालमै रहेका सन्तानले पनि अंगिकृत नागरिकता पाउँछन् ।
अर्कोतर्फ, १५ वर्ष नेपालमा स्थायी रूपमा बसोबास गरेको व्यक्तिले पनि अंगिकृत नागरिकता पाउँछन् । त्यस्तो नागरिकता जिल्लाले नभई गृह मन्त्रालयकै निर्णयबाट जारी हुन्थ्यो, त्यस्ता सबै अभिलेखहरू गृह मन्त्रालयमा थिए ।
#OnlineKhabar
