काठ्माण्डौँ।
नेपालमा पहिलोपटक मोटरेबल पक्की पुलसम्बन्धी प्रदर्शनी मेला सुरु भएको छ । ललितपुरको मानभवनस्थित क्रिस्टल ब्याङ्क्वेटमा मंगलबारबाट सुरु भएको दुईदिने मेला शहरी विकास मन्त्रालय अन्तर्गतको स्थानीय पूर्वाधार विकास विभाग र स्विस सरकार विकास सहयोग (SDC) अन्तर्गतको स्थानीय सडक पुल सहयोग इकाई (LRBSU) को संयुक्त आयोजनामा भइरहेको हो ।
प्रदर्शनीको उद्घाटन शहरी विकास मन्त्रालयका सहसचिव गणेशप्रसाद वस्तीको अध्यक्षतामा भएको कार्यक्रममा प्रमुख अतिथि नेपालका लागि स्विस राजदूत डा. डेनियल म्युली रहेकीथिइन् । उद्घाटन समारोहमा सातै प्रदेशका भौतिक पूर्वाधार तथा यातायात मन्त्रालयका सचिवहरू, सडक विभाग, निर्माण व्यवसायी संघ, इञ्जिनियर, विद्यार्थी, विज्ञ समुदाय र सर्वसाधारणको उल्लेखनीय सहभागिता रहेको थियो ।
राजदूत म्युलीले सन् २०११ मा नेपाल सरकार र स्विस सरकारबीच भएको द्विपक्षीय सहमतिपछि सुरु भएको यस कार्यक्रमले ८ सयभन्दा बढी मोटरेबल पक्की पुलहरूको निर्माण गरिसकेको बताउँदै यस प्रदर्शनीले सहकार्यको सफल यात्रालाई सार्थक बनाउने विश्वास व्यक्त गरिन् । उनले यस सहकार्यलाई “विकासको मूर्त रूप” भन्दै साझा प्रतिबद्धताको सकारात्मक परिणामका रूपमा उदाहरणीय रहेको बताइन् ।
लुम्बिनी प्रदेश सरकारका भौतिक पूर्वाधार सचिव भीमार्जुन पाण्डेका अनुसार स्विस सरकारसँगको यो सहकार्यको अन्तिम वर्ष भएकोले अहिलेसम्मको उपलब्धि, चुनौती र अनुभूतिको समग्र प्रस्तुती दिनु नै एक्जिबिशनको उद्देश्य हो । उनले क्लाइमेट चेन्जका असर, डिजाइन परिवर्तनका उपाय, र अर्जित ज्ञानलाई समावेश गर्दै प्रदर्शनीलाई शैक्षिक र व्यावसायिक रूपमा महत्वपूर्ण मञ्चको रूपमा चित्रण गरे ।
इकाई प्रमुख शकिल मानन्धरका अनुसार प्रदर्शनीमा पुल निर्माणमा प्रयोग भइरहेका नवीनतम प्रविधिका मोडेलहरू, डकुमेन्टरीहरू, डिजाइन ज्ञान, र देशभर निर्माण भएका पुलहरूको फोटो प्रदर्शनी समावेश गरिएको छ । यस्तै, स्थानीय पूर्वाधार विभागअन्तर्गत सडक तथा पुल शाखा प्रमुख भरत कुमार यादवले प्रदर्शनीले भावी इञ्जिनियर, विद्यार्थी, नीति निर्माता र सरोकारवालाका लागि ठूलो सिकाइको प्लेटफर्मको रूपमा काम गर्ने विश्वास व्यक्त गरे ।
जय विष्णु निर्माण सेवा प्रालिका म्यानेजिङ डाइरेक्टर अनिल सिलवालले यस्तो प्रदर्शनीले सामान्य जनताको जिज्ञासा “पुल कसरी बन्छ ?” भन्ने प्रश्नको उत्तर दिने मात्र होइन, यस क्षेत्रमा काम गर्न चाहनेहरूका लागि व्यावहारिक ज्ञानको थालो प्रदान गर्ने बताए ।
मंगलबार देखि सुरु भएको प्रदर्शनी बुधबार १०ः०० देखि दिउँसो ४ः०० बजेसम्म सर्वसाधारणका लागि खुला रहने इन्जिनियर हरिसंकर जोशीले बताए । आयोजक संस्थाले विद्यार्थी, विज्ञ, नीति निर्माता र आम जनसमुदायलाई सहभागी भई मूल्यवान सुझाव र अनुभव बाँड्न आग्रह गरेको छ ।
