काठमाडौँ । अमेरिकाले भेनेजुएलामा हस्तक्षेप गरी राष्ट्रपति निकोलस मादुरोलाई नियन्त्रणमा लिएपछि अन्तर्राष्ट्रिय बजारमा सुन र चाँदीको मूल्यमा तेज वृद्धि देखिएको छ। लगानीकर्ताहरू भूराजनीतिक जोखिम बढ्ने आशङ्कामा सुरक्षित विकल्पतर्फ आकर्षित भएका छन्।
सोमबार एसियाली बजारमा सुनको भाउ १.८ प्रतिशतले बढेर प्रतिऔंस करिब ३,२८२ डलर पुगेको छ। त्यस्तै, चाँदीको मूल्य ३.५ प्रतिशतले उकालो लागेको छ। सन् २०२५ मा सुन र चाँदीले ऐतिहासिक रेकर्ड कायम गरेका थिए।
डिसेम्बर २०२५ मा सुन प्रतिऔंस ४,५४९ डलर ७१ सेन्टको उच्चतम बिन्दुमा पुगेको थियो। अमेरिकी केन्द्रीय बैंकको ब्याजदर कटौतीको अपेक्षाका साथै बैंकहरूले गरेको ठूला खरिद र विश्वव्यापी आर्थिक अनिश्चितताले वर्षभरि सुनको मूल्यलाई टेवा दिएको थियो।
तेल बजारमा भने ‘पर्ख र हेर’ को अवस्था रहेको छ। सोमबार ब्रेन्ट क्रुडको भाउ ०.७९ प्रतिशत घटेर ६० डलर २३ सेन्ट प्रतिब्यारेलमा कारोबार भएको छ। विश्व तेल उत्पादनमा भेनेजुएलाको हिस्सा १ प्रतिशतभन्दा कम रहेको र पूर्वाधार कमजोर भएकाले तत्काल मूल्यमा ठुलो असर नपर्ने विश्लेषकहरूले बताए ।
तर, राष्ट्रपति डोनाल्ड ट्रम्पले भेनेजुएलाको तेल अमेरिकी नियन्त्रणमा आउने घोषणा गरेसँगै आगामी दिनमा ऊर्जा बजारमा कस्तो असर पर्छ भन्ने विषयमा अन्योल कायमै छ।
अन्तर्राष्ट्रिय बजारमा सुन–चाँदी र तेलको उतारचढावले लगानीकर्ताहरूको ध्यान केन्द्रित बनाएको छ, र आर्थिक विश्लेषकहरूले आगामी दिनमा बजारको गतिशीलता नजिकबाट हेर्नुपर्ने चेतावनी दिएका छन्।
