विराटनगर । श्रम संस्कृति पार्टीका अध्यक्ष हर्कराज राई (हर्क साम्पाङ) ले आगामी फागुन २१ गते हुने प्रतिनिधिसभा निर्वाचनमा सुनसरी क्षेत्र नं. १ बाट उम्मेदवारी दिने घोषणा गरेका छन् ।
सामाजिक सञ्जालमार्फत घोषणा गर्दै साम्पाङले सुनसरी–१ बाटै चुनाव लड्ने स्पष्ट पारेका हुन् । उनले लेखेका छन्, ‘म सुनसरी क्षेत्र नं. १ बाटै प्रतिनिधिसभाको चुनाव लड्नेछु । जय माटो ! जय देश !’
साम्पाङ २०७९ सालको स्थानीय तह निर्वाचनमा धरान उपमहानगरपालिकाको मेयर पदमा निर्वाचित भएका थिए । उनी निर्दलीय उम्मेदवार का रूपमा निर्वाचित भएपछि आफ्नै अध्यक्षतामा श्रम संस्कृति पार्टी दर्ता गरेका हुन् ।
२०७९ को प्रतिनिधिसभा निर्वाचनमा सुनसरी–१ बाट अशोक राई निर्वाचित भएका थिए । उनी एमाले–जसपा गठबन्धनका उम्मेदवार थिए ।
आसन्न निर्वाचनका लागि नेकपा एमालेबाट केन्द्रीय सदस्य मञ्जु भण्डारी, पूर्व प्रतिनिधिसभा सदस्य जयकुमार राई र टिका माङ्लेनलगायतको नाम सिफारिस भएको छ ।
यसैगरी, नेपाली कांग्रेस सुनसरी क्षेत्र नं. १ ले प्रतिनिधिसभा सदस्यको प्रत्यक्षतर्फ उमेश थापासहित आठ जनाको नाम सिफारिस गरेको छ ।
कांग्रेसले महाधिवेशन प्रतिनिधि चन्द्रशेखर लामा, क्षेत्रीय सल्लाहकार निर्मला गुरुङ, जिल्ला सचिव माधवबहादुर घिसिङ, केन्द्रीय सदस्य मीनबहादुर विश्वकर्मा, नेपाल महिला संघ जिल्ला सदस्य रुक्मिणा गौतम (कोपिला), महासमिति सदस्य विनोदकुमार राई र महाधिवेशन प्रतिनिधि सन्दीप श्रेष्ठको नाम पनि सिफारिस गरेको जनाएको छ ।
